28 Urr Joven, Crianza, edo Selección Privada: bata bestearengandik bereizten duena
«Zein aukeratu beharko nuke?». Hori da gure ardo beltzei buruz gehien entzuten dugun galdera. Erantzuna ez dago hainbeste «hobea» denaren araberakoa, baizik eta noiz irekitzeko asmoa duzunaren araberakoa. Hona hemen hiruren arteko desberdintasunak:
Mazerazio karbonikoa: zuzenena
Tempranilloa (% 92) eta Viura ukitu bat (% 8) nahasten dira, fruta-izaera indartzeko. Mahats-mordoak osorik sartzen dira hartzidura-tangara; han 10 bat egunez hartzitzen uzten dira, eta, ondoren, prentsatu egiten dira. Emaitza ardo beltz gazte eta distiratsua da, marrubi, grosella eta mugurdi usainekin; ahosabaian zetatsua da, tanino leunekin. 14 °C-an kontsumitzea gomendatzen da, aperitiboekin, hestebeteekin edo arroz-platerekin lagunduta.
Crianza: aukera orekatua
Tempranilloa (% 95) eta Gracianoa (% 5) nahasten dira; 40 urtetik gorako mahastietatik datoz, eta 12 hilabetez ontzen dira haritz frantziar eta amerikarrez egindako upeletan. Fruta beltz helduen, bainuilaren eta zedroaren notak ditu. Ahosabaian beroa eta inguratzailea da, eta amaiera luzea du. 17 °C-an zerbitzatuta, lagun ezin hobea da hestebeteetarako, parrillan egindako haragietarako edo ehiza txikirako.
Selección Privada: finduena
70 urtetik gorako mahastietako % 100 Tempranillo mahatsez egina; ardo hau pigeage (azal-geruza muztioan hondoratzea) teknikaren bidez lantzen da, eta 18 hilabetez ontzen da haritz frantziarrean. Indartsua da, baina aldi berean zetatsua; fruta beltzen eta piperraren notak ditu, eta amaiera luzean ñabardura gazi eta zaporetsu sotilak nabari zaizkio. 17 °C-an gozatu, gisatuekin, parrillan egindako haragiekin edo ehiza-haragiekin batera.
Nola aukeratu
Aperitibo baterako edo arroz-plater baterako zerbait eskuragarri eta erraza bilatzen baduzu, aukeratu mazerazio karbonikoa. Lagunekin bazkaltzeko edo etxean afaltzeko, berriz, aukeratu Crianza. Eta une berezi baterako —edo menuan ehiza-haragia zein su motelean prestatutako gisatua daudenean—, aukeratu Selección Privada.
Hiru ardo, hiru une desberdin; denak lur beretik sortuak.